للمحجبات, كتالوج

**نانسى السكرة** · 09-01-2010, 06:01 AM

**نانسى السكرة** · 09-01-2010, 06:22 AM

أما العروس المحجبة تستطيع إضفاء مظهر جديد على ربطة الفرح حتى يظهر جمال الطرحة مثل استخدام الورد على جانب الرأس، أو إضافة بعض قطع الاكسسوار المصنوع من الماس في تنسيق لطيف.
موضة طرحة العروس المحجبة عبارة عن ربطة "باندانا" مطرزة بفصوص اللؤلؤ والترتر وتنتهي بطرحة كبيرة من الوراء ، وبوجه عام فإن تحديد طريقة الطرحة بالنسبة للعروس المحجبة يرتبط إلى حد كبير بتصميم الفستان وطول الذيل وشكل وجه العروس.

نقره على هذا الشريط لتكبير الصورة

ربطات السهرات الخاصة أصبحت تخضع هي الأخرى للابتكار والتنويع بإضافة اكسسوارات من الماس أو الترتر وغيرها حتى لا تشعر المرأة المحجبة بأنها خارج لعبة الموضة والأناقة ، وتضغي ألوان ربطات الرأس في الخريف القادم فسوف يطغى عليها اللون الذهبي والبنفسجي بدرجاتهما أما في الشتاء فيتربع اللون البني الغامق والأحمر الداكن.

نقره على هذا الشريط لتكبير الصورة

وبالرغم من ذلك تحتار العروس عند تجهيز الزفاف ، ولكن ثمة مثل إنجليزي إذا ما اتبعته العروس فإنه يساعدها كثيراً والذي يتلخص في هذه القصيدة النثرية "شيء قديم. شيء جديد. شيء مستعار. شيء أزرق وستة بنسات في حذائك".
أما ارتداء الطرحة أمر أساسي، فالعروس لا يمكن أن تتزوج من دون طرحة الأمر الذي يجعل ثوب الزفاف يبدو كثوب عرس بحق ، كما أن هناك بديلاً يتمثل في قبعة انتشرت في عشرينات القرن الماضي ، أيضاً تتوافر طرح تشبه البونيه وهي مصنوعة من خيوط متشابكة تنتهي بأسلاك ولؤلؤ.

الفيديوهات التالية لنانيس سليم تشرح طرق لربطات الحجاب
ومرتبة الترتيب السليم حسب التصوير لكل مقطع من الاجزاء السبعة

الفيديو الاول

الفيديو الثاني

الفيديو الثالث

الفيديو الرابع

الفيديو الخامس

الفيديو السادس

الفيديو السابع

يتبع

**نانسى السكرة** · 09-01-2010, 06:48 AM

ولان أغلب البنات النهارده محجبات وأصبح اهتمامهم بالحجاب يوازي أو يفوق اهتمامهم بشعرهم، وأصبح البديل للكوافير والبحث عن قصة جديدة أو لون مختلف هو لف الطرحة بألوان زاهية على آخر موضة

أشكال ربطات على هيئة تسريحة شعر "ضفيرة وكحكة"، وأما الأقمشة (دي فيها كلام كتير) "تل" و"شيفون" "وترتر" للصبح والضهر وفي كل وقت والمعادلة الصعبة في كل الحاجات دي ازاي أكون محجبة أحترم "حجابي" وفي نفس الوقت شكلي حلو "ستايل" على الموضة ومش "مبهرج" ولافت للنظر لدرجة تثير انتقاد الآخرين..

اشكال متنوعة لربطات الحجاب

يتبع

**نانسى السكرة** · 09-01-2010, 06:54 AM

الربطات الإسبانش

دي مجموعة من الربطات الإسبانش للبنات اللي بتحب إنها تلبس إسبانش بس في نفس الوقت بتحب الطرحة تكون مغطية منطقة الرقبة.. وعلى فكرة مجموعة الربطات دي بسيطة جدا وسهلة في التنفيذ بس أنتِ امشي واحدة واحدة زي ما إحنا هنقولك ولو أول مرة ما طلعتش الربطة مضبوطة معاكي جربي تاني وإن شاء الله هتطلع معاكي مضبوطة وزي الفل.

الربطة الأولى

1- هتجيبي بندانة قطن وتلبسيها بعد كده هتجيبي إيشارب طويل وتحطيه في منتصف رأسك

2- هتجيبي دبابيس علشان تثبتي الإيشارب في منتصف رأسك... هتجيبي أحد أطراف الإيشارب وتلفيه حوالين رقبتك وتثبتي طرف الإيشارب بدبوس على أحد الأجناب.
ده الشكل النهائي اللي هتلاقيه في النهاية

الصور

الربطة التانية
1- هتجيبي إيشارب طويل وتربطيه كويس من الخلف وياريت الربطة دي تكون حوالين كحكة شعرك... هتجيبي الإيشارب التاني وتحطيه من قدام بطريقة مائلة بحيث إن جزء من الإيشارب الأولاني يبان وتربطيه من الخلف.

2- هتلفي أحد أطراف الإيشارب الأول حوالين كحكة شعرك مرة واحدة وتثبتي الطرف ده بالدبابيس كويس وتسيبي الطرف التاني علشان تعملي بيه ضفيرة... هتجيبي أحد أطراف الإيشارب الثاني وتلفيه حوالين رقبتك وتثبتيه بدبوس من على الجنب

3- هتمسكي الطرف الثاني من كل إيشارب وتضفريهم مع بعض.. وتسيبي الضفيرة دي على ظهرك أو على كتفك.

على فكرة ممكن تبتكري حاجات تانية في اللفة دي زي مثلا إنك تحطي الإيشارب التاني بشكل ثابت على رأسك مش مائل بحيث إن جزء بسيط من الإيشارب الأولاني يبان.ده الشكل النهائي اللي هتلاقيه في النهاية

الصور

الربطة الثالثة
1- هتربطي شعرك بالإيشارب من الخلف.. هتجيبي إيشارب تاني يكون لونه مناسب للون الإيشارب الأولاني وتحطيه في منتصف رأسك وتربطيه هو كمان من الخلف

2- هتبدئي في إنك تلفي الإيشارب التاني حوالين كحكة شعرك وتثبتي اللفة دي بالدبابيس.

3- هتجيبي أطراف الإيشارب الأولاني وتربطيه حوالين رقبتك من الأمام.. على فكرة بالشكل ده ممكن تستغني عن الكوفيه اللصوف اللي ممكن تلبسيها في الشتاءده الشكل النهائي الي هتلاقيه في النهاية

الصور

الربطة الرابعة

الرابطة دي موضة جداً، ازاي نربطها "صح" خطوة خطوة.؟

أولاً نلبس بونيه قطن يلم الشعر كويس وبعد كده نجيب طرحة مستطيلة لون تاني، فلو إن البونيه بني محروق تكون الطرحة تركواز تبين جزء من البونيه ونحط الطرحة الثانية بمحاذاة خط البونيه ونربطها على ورا كويس جداً وممكن نجيب طرحة تانية شيفون مثلاً وتكون لونها بني محروق ونربطها فوق التركواز، بعد كده نبين جزء منها زي ما عملنا في الخطوة السابقة ونربط كويس جداً، بعد كده نبدأ في ربط أطراف الطرحتين البني والتركواز بحيث ممكن نربط طرف الأولى مع الثانية والعكس، وإنتِ قدام المرايا هتلاقي نفسك بتربطي الأطراف، وممكن تبتكري تعملي الأطراف "كحكة" أو تعملي بطرف "كحكة" وتسيبي الطرفين نازلين على كتفك على حسب ذوق وشكل وجهك.

واليك بالصورة طريقة ربطها

**نانسى السكرة** · 09-01-2010, 07:00 AM

نصائح ذهبية لكل بنت محجبة ازاي تتعامل صح مع الحجاب

ألوان الموضة في الإيشاربات

لون الطرحة حسب لون اللبس ولكن اللون البني هو الأساس السنة دي وبيدخل معاه البرتقالي, التركواز, الروز, الزيتي بدرجاته, البني لوحده, البني المحروق مع البني العادي موضة جداً واستخدام الألوان الجديدة وتداخلها بيعطي نتيجة حلوه جداً..

هل البني المحروق ممكن "يغمق" البشرة وخاصة إن لوننا خمري أحياناً مائل للاسمرار؟
لا أبداً البني جميل جداً مع كل ألوان البشرة، على فكرة أنا عندي مبدأ إن كل الألوان تليق على البشرة السمراء أو البيضاء بنفس الدرجة، حكاية إن الروز والموف لا تصلح للبشرة السمراء أو الخمرية أو إنه "بيسمر جداً" ده كلام مش صحيح، النهارده مافيش لون صريح.. الروز له درجات مختلفة وموجودة في كل أنواع المكياج، كمان الموف, والأخضر.. المهم اختيار الدرجة من اللون القريبة من درجة لون البشرة وأكيد هتكون مناسبة ولا تعطي نتيجة عكسية

فيديوهات لنانيس سليم

الفيديو الاول

الفيديو الثاني

الفيديو الثالث

الفيديو الرابع

الفيديو الخامس

**نانسى السكرة** · 09-01-2010, 07:21 AM

اشكال متنوعة لربطات الحجاب

ازاي تختاري خامة أو قماش الإيشارب صح؟

نوع القماش أو خامة الإيشارب تعتمد على نوع اللبس، كمان فيه أنواع من الأقمشة من المفضل نتجنبها حتى لو عجبك لونها أو تطريزها أو نقشتها.. من الأقمشة المزعجة في لبس الحجاب "الأوراجنزا الهايشة".. ابعدي عن الأقمشة "الناشفة" لأنها صعبة في الربط، خلي عنيكِِ على نوعية الأقمشة الناعمة والأقطان، الحرير على قطن، الشيفونات بأنواعها كلها خامات حلوة جداً ومناسبة وعملية والتل كمان... بأكد إن الإيشارب مهم إنه يكون عملي في اللف، ممكن الإيشارب يكون غالي ووحش في ربطته وبعد شوية هتكرهي الإيشارب وهتركنيه على جنب بعد ما غرمتي ثمنه.

نوعية القماش المناسبة والعملية للبنت في الجامعة عشان يكون حجابها مريح وفي نفس الوقت شكلها مش مبهدل؟ تختار الأقطان والشيفونات المطفية "بدون لمعة".. الأقمشة دي بتستحمل جداً الحركة طول النهار، فالأقطان فيها ألوان كثيرة وأشكالها حلوة جداً، والقطن على حرير فيه تطريز خفيف حلو كمان وموضة جداً يكون في طرف الإيشارب تطريز أو ترتر بس المهم يكون "Simple" جداً.. عشان الجامعة ممكن تختار الإيشاربات

الأقطان المخططة أو المنقوشة، فيه مساحة تنوع النهارده وألوان ينفع تدخل مع بعض تعطي شكل جديد في كل مرة والتطريز البسيط يعطى جمال ورقة

ربطات حجاب منوعة

إيه هي أحدث خامات الطرح؟

كل فصل من فصول السنة له خامة، يعني في فصل الصيف ممكن نلبس الطرح الأقطان الخفيفة والشيفون.. وفي فصل الشتاء نلبس الطرح القطن الثقيلة شوية وهي موضة جدا السنة دي، أما الأورجانزا والتول والشيفون فممكن نلبسهم في أي وقت وبيناسبوا أكثر السهرات والسواريه.

أحدث أشكال ونقشات الطرح إيه؟

الألوان المتداخلة مازالت موضة والطرح الكاروه والطرح المنقطة والطرح اللي فيها كور موجودة بكثرة والطرح المقلمة..

ومعظم الخامات دلوقتي فيها لمعة وممكن نلاقي اللمعة الفضي والذهبي مع بعض، يعني مثلا تلاقي القماش كاروه أحمر وأسود وفيه لمعة فضي أو ذهبي ولون رصاصي وفيه لمعة فضي، والأشكال المنتشرة الآن الطرح الضخمة زي (الشال).

واللمعة اللي موجودة في الطرح ممكن نلبسها في النهار؟

معظم البنات كانوا متخوفين إنهم يلبسوا الطرح اللي بتلمع في النهار لكن دلوقتي أصبحت موضة جدا

هل ربطة الطرحة الإسبانش تراجعت شوية؟

أيوه الربطة الإسبانش تراجعت وأصبحت منتشرة حاليا الربطة المنفوشة وخصوصا الطرح الصوف المنقوشة ونازلة على الظهر كله ووجود أكثر من طرحة مع بعض.

**نانسى السكرة** · 09-01-2010, 07:33 AM

وإيه هي أحدث أشكال وأنواع البندانة؟

أولا أنا عايزة أنصح كل البنات بإنهم يلبسوا (البندانة القطن) في الأساس على شعرهم مباشرة لأنها مفيدة وصحية جدا وتمنع تساقط الشعر وتحافظ عليه وكمان بتساعد على وضع الدبابيس كويس ولا تساعد على تزحلق الطرحة...

وعلى فكرة البندانة دلوقتي بقت بديل عن الطرحة، يعني تقدر البنت تضع أكثر من لون للبندانة على إنهم طرح ملونة وتضع في النهاية طرحة واحدة في الواجهة، وفيه أنواع كثيرة من البندانة زي البندانة الليكرا ;شيفونالتول. وعرضها 10سم وطولها 30 سم وكمان البندانة المستطيلة والبندانة الكاملة على الرأس وممكن البنت تلبسها بطريقة مائلة والعكس

هل ممكن البنت تستخدم الطرحة لإخفاء عيوب الوجه والمناطق الضخمة في وجها؟

آه طبعا.. أكيد..

طيب ازاي؟

شوفي لو مثلا البنت وجهها طويل يبقى تحاول تعمل الطرحة لتحت في اتجاه الخلف أو على جنب، وبعدين تقصر الجبهة وتضيف أي حاجة على الجانب علشان الوجه يبان إنه عريض.

وخلّي بالك إن الوجه الطويل لا يتناسب معاه الربطة العالية لأنها هتطوّل الوجه أكثر.

طيب لو بنت وجهها مدوّر؟

يبقى بلاش تلف الطرح على جنب إطلاقا لأنها تزيد من مساحة (الخدود) وتعمل الطرحة للخلف، لتحت أو لفوق، وممكن تعمل الطرحة شينوه لفوق، وممكن تعمل الربطة ديل حصان لفوق عشان الوش يكون رفيع.

والوجه المربع أو المستطيل؟

الوجه المربع والمستطيل بيكون عنده أربع بذور، اثنتين في الجبهة واثنتين في الفكين وعلشان كده لازم تنزل بالطرحة لتحت شوية ونعمل (كروس) طرحة عكس الثانية والطرحة بتساعد إن الوش يكون رفيع وتحاول تداري الجبهة وتحاول تنزل بالطرحة على الجبهة وتقفل الجبهة.

والوجه البيضاوي؟

معظم الربطات تمشي معاه وممكن تعمل ربطة على جنب أو تقفل من قدام أو تعمل كروس.

طيب صاحبة الأنف الكبير تعمل إيه؟؟

صاحبة الأنف الكبير بيكون عندها مشكلة في الحجاب لأن أنفها ظاهر وواضح في الوجه وفي هذه الحالة ماينفعش معاها إننا نعمل إسبانش للخلف أو طرحة هابطة وماسكة على وجهها فتحاول إنها تلبس طرحة منفوشة شوية أو تضع إكسسوار أو تعمل أكتر من طبقة أو تدخل أكثر من بندانة عشان تخطف العين ولا تجعل التركيز على أنفها.

لو الشفايف كبيرة نعمل إيه؟

نفس الحكاية تحاول تلفت النظر بأي شيء يبعد التركيز عن وجهها وتعمل ماكياج كثير على عينها والطرحة تكون منفوشة وتغير في الربطات والألوان.

نتكلم بالتفصيل شوية عن شكل الربطة المناسبة للبنت في الجامعة؟

ربطة الطرحة لازم تكون بسيطة وخفيفة فممكن تستخدم طرحة أو طرحتين على الأكثر.. يا ريت تحاول تبعد عن الألوان الكثيرة وتكون رقيقة على قد ما تقدر وتبعد تماما عن التول والأورجانزا. وتاخد بالها كويس جدا من لبسها فلو مثلا لابسة حاجة سادة يبقى ممكن الطرحة يكون فيها ألوان، لكن لو لابسة حاجة ملونة أو فيها نقوش يبقى لازم الطرحة تبقى سادة.

وممكن البنت تنوع في شكل ربطة الطرحة بتاعتها وهي رايحة الجامعة فممكن إنها تعمل ربطة إسبانش، بس تاخد بالها إنها تلفها زي الكحكة وتجيبها على قدام، ولو مش عايزة إسبانش يبقى تربطها عادي بطرحة أو طرحتين أو طرحة وبندانة.

عايزين طريقة لفة طرحة تكون روشة؟

1 - نجيب إيشارب واحد نربطه من الخلف طرف طويل وطرف قصير.

2 - الإيشارب الثاني نمسكه بطريقة مائلة ونربطه من الخلف.

3 - كده أصبح عندي أربعة أطراف في الخلف، 2 قصيرين و2 طوال.

4 - بعد كده أجيب واحد من الطرفين الطوال وأطلع بيه عدل وأربطه تاني للخلف.

5 - كده المنظر أو الشكل عدل بميل واللي بعده عدل.

6 - هيكون باقي عندي طرف طويل وطرفين قصيرين.. في هذه الحالة ممكن أجيب الطرف الطويل ألفه على الكحكة وأجيب الثلاثة أطراف على قدام.

7 - لو الأطراف طويلة أعملهم ضفيرة لقدام أو على الخلف.

8 - وممكن فكرة ثانية أجيب الطرف الطويل ألفه على الطرفين القصيرين وأمسكهم في النصف بإكسسوار على كحكة من وراء.

9 - إذن المنظر في النهاية هيكون من قدام عدل ومائل ومن الظهر الأطراف عاملة زي (ذيل الحصان) ومربوطة بإكسسوار.

ربطة الطرحة السواريه تكون عاملة ازاي؟
الأفضل تكون أكثر من طرحة وفي البداية:

1 - أبدأ الأساس بالطرحة الشيفون.

2 - بعدين أضع الطرحة التول عشان بيعطي للبنت شكل فخامة.

3 - وبعدها أضع إكسسوار زي (شريط ستان – سلاسل خرج النجف) أو قطعة من الفستان.

4 - وبعدها أقفل الطرحتين بأكثر من طريقة ممكن الشيفون والتول مع بعض لقدام أو المهم مع بعض كلهم شنيوه عالي لفوق.

عايزين نعرف طريقة ستايل لربطة التول والشيفون؟

1 - أجيب الطرحة الشيفون أربطها على شكل كحكة.

2 - أجيب الطرحة التول وألبسها من الخلف وأعملها كروس على قدام.

3 - أنزل بيهم تاني للخلف وكده هيعطيني شكل البندانة.

4 - بعد كده ألمهم كلهم مع بعض على تحت الشيفون مع التول

عايزين نعرف طريقة ثانية لربط ثلاث طرح وتكون روشة؟

1 - الطرحة الشيفون أول طبقة.

2 - الطرحة الثانية أجيبها من نصف رأسي بالطول.

3 - الطرحة الثالثة التول أطلع بها كروس لفوق.

4 - أجيب الطرحة الشيفون اللي عملتها من نصف رأسي للوراء.

5 - أرجع تاني وأقفل (كروس) وأنزل كأني أدخلت الشيفون وقفلتها من المنتصف.

الشكل هيظهر عندي كالتالي:

6 - اللون الأول قفلت بيه شعري.

7 - بعدين طلعت بالتول كروس.

8 - وبعدين قفلت من النصف بلون ثاني شيفون.

9 - وكده هيكون شكل الألوان متداخلة. وقفلت المنطقة الأمامية.

بعد كده أعمل إيه؟!

10 - هتكون عندي الأطراف للوراء.

أعمل فيها إيه؟

11 - لو وجهي مليان تكون الأطراف للوراء.

لو وجهي رفيع أجيب الأطراف للأمام.

لو جسمي قصير أرفع الأطراف لفوق.

لو جسمي طويل أنزل بالأطراف لتحت.

فيه بنات كتير بتحب تلبس طرحة واحدة. تربطها ازاي؟

دي ليها أكتر من طريقة:

الطريقة الأولى:

تربطها عادي جدا من الخلف وبعدين تجيب الطرفين على قدام وتربطهم كأنهم زي (الإسكارف أو الكوفية) وتمسكهم بإكسسوار من النصف وممكن تلبس بندانة.

الطريقة التانية:

تربط الطرحة من الخلف وتجيب الأطراف لقدام على شكل حلزوني وتربط أطرافهم بإكسسوار أو شريطة.

طيب والبنات اللي بتحب تلبس أكتر من طرحتين.. الربطة تكون ازاي؟

تعمل طرحة واحدة عدلة وتطلع بواحدة كروس والثانية عدلة أو تلبس بندانة والطرحتين كروس، يعني تضعها بطريقة مائلة وتربطها من الخلف.. والطرحة الثانية تكون عكس الكروس الأول وتربطها بطريقة مائلة من الخلف وممكن تعمل كمان من الأطراف كروس عكس الكروسات الأولى.

البنت المصرية بتحب الربطة الخليجي.. تعملها ازاي؟

1 - تجيب بندانة وتلبسها كويس على رأسها.

2 - تجيب الطرحة وتلفها وتكون من الناحية اليمين قصيرة ومن الناحية الشمال طويلة.

3 - وتربطها بدبوس وتكون (مرحرحة).

4 - بعد كده تجيب الطرف الشمال وتلف الطرحة على الرأس بشكل طرفين.

5 - وبعد كده الناحية القصيرة تتركها على كتفها وتجيبها من الخلف إلى الأمام.

واللفات المغربي والهندي بتكون شكلها ازاي؟

اللفات دي بتكون غير ثابتة ولفها بيكون بطريقة عشوائية وتكون مطابقة لشكل العبايات لأن المغاربة بيحبوا يلبسوا عبايات وتكون خامة الطرحة نفس خامة العباية ويضعوا إكسسوار على الطرح وبيعملوا أكثر من لفة وينفشوها

**نانسى السكرة** · 09-01-2010, 07:41 AM

الربطة المنفوشة أعملها ازاي؟

1 - أجيب طرحة وأربطها من الخلف إسبانش.

2 - الطرحة الثانية نجيبها لقدام.

3 - الطرحة الثالثة تكون منفوشة ونربط طرف منها على فوق والطرف الثاني على الكتف.

4 - الناحية العريضة نرفعها لقدام كأنه شال.

ما الألوان المتناسقة مع بعضها وتكون موضة؟

الفوشية مع الأحمر، والأورانج والبني، والموف مع الأصفر والتركواز.. وأنا في رأيي إن معظم الألوان تتناسب مع بعضها لكن المهم اختيار الدرجة.. يعني درجة معينة مع الأصفر ودرجة معينة مع التركواز وتداخل الألوان يحتاج تركيز ويعتمد على الإحساس الشخصي.

لو مش عاوزة ألبس الطرحة نفس لون البلوزة أعمل إيه؟

لو البلوزة أورانج مثلا ممكن ألبس طرحة زيتي أو بصلي أو أكثر من لون بس يكونوا مناسبين للون البلوزة

ربطات حجاب سوارية

ربطات حجاب لسن 30

**نانسى السكرة** · 09-01-2010, 07:50 AM

ربطات حجاب بلونين مختلفين

ربطات شيك

ربطات حجاب للزفاف و الخطوبه

أفكار لحجاب ممكن يناسب لفترة بعد الظهر أو بالليل؟

ممكن تحتفظي بشكل ربطتك اللي بترتاحي معاها والمناسبة لشكل واستدارة الوجه وتستخدمي إكسسوار مختلف.. حلق كبير، سلسلة فيها دلاية فيها حجر فيروزي، خاتم فضي بفص ملون.. النهارده مافيش لبس محدد للنهار وآخر لليل، مساحة الحركة تكون إضافة حاجة جديدة للبسك حسب وقت الخروج وطبعاً المناسب للمكان.

ازاي البنت المحجبة تختار الربطة المناسبة لشكلها؟

لازم البنت تعرف هي بتحب إيه، الربطة التقليدية أو الربطة "الاسبانش" المربوطة "على ورا" عشان تكون مرتاحة ومقتنعة بربطة الإيشارب، ولو هي محجبة جديد ماتستعجلش على نفسها "شوية..... شوية" مش معقول هتقدر تلف الإيشارب زي واحدة متحجبة من زمان.. البنات بتكتئب وبتزعل قوي عشان شكل حجابها مش "مظبوط" عشان كده لازم المحجبة جديد تلبس في الأول حجاب ربطته سهلة ولا تستخدم أنواع ناعمة جداً ممكن تتزحلق بسرعة وتظهر شعرها، ممكن تستخدم الأقطان في البداية لأنها بتثبت، وعشان تلم شعرهاكويس جداً تلبس "بونيه" قطن ولا تظهره، ومهمته مساعدتها في تثبيت الإيشارب ويمسك الشعر كله وتختار ربطة سهلة.

نصيحة للف الطرح التقليدية
لازم تلبسي بونيه قطن وتحطي الإيشارب على حرف البونيه عشان يختفي وتمسكي الطرف القصير بدبوس

مشبك بالطرف الكبير وتلفي الطرف الطويل حول الرأس وتثبتي بالدبابيس، وبلاش أكتر من إيشارب في الأول.. كفاية لفة بسيطة.

ولو عاوزة تدخل ألوان في اللفة التقليدية
زي ما قلنا البونيه وبعد كده الإيشارب على حرف البونيه وبعدها تمسك الطرف القصير بالطرف الطويل عند الرقبة، وبعد كده الإيشارب الثاني بعده بمسافة من الأول وتمسك أطرافه وتلف طرف الأولى وطرف الثانية في اتجاه واحد بشرط طرف يظهر لونه قبل الثاني، أو تحط الطرفين فوق بعض وتلفهم مرة واحدة وتحط دبابيس للتثبيت.

ممكن تلبس "بندانا" وتلف الطرحة، ونصيحتي بلاش وضع شريط بلاستيك في مقدمة الطرحة.. ممكن تستخدمي "اسبراي نشا مخصوص للمكوى"، عشان تنشي الطرحة.

إيه رأيك في إضافة الضفيرة من قماش وعمل "الكحكة" بالربطة "الإسبانيش"؟

بصراحة لا أفضل الإضافات الكثيرة للحجاب طالما اخترتِ الحجاب عن قناعة لازم تكوني محتشمة وبسيطة في نفس الوقت... لازم تتعاملي مع الحجاب وكأنه شعرك وتحبيه عشان شكلك يكون حلو فيه ولما توصلي للدرجة دي أكيد هتبتكري في الربطات أكثر

نصيحة للعروسة المحجبة

تبحث عن لون مناسب لبشرتها يبرز جمال لونها تفكر في موديل مناسب لجسمها وتفكر ازاي يكون شكلها مختلف وجديد، ومش شرط إن موديل أو ربطة عجبتك إنها ممكن تنفع معاك أو تليق عليك، وكمان تختار حد يساعدها في ربط الطرحة لأنه متخصص وبيتحكم أكثر في الربط وله خبرة في ابتكار ربطات جديدة.

**نانسى السكرة** · 09-01-2010, 07:55 AM

الفيدوهات

الفيديو الاول

الفيديو الثاني

الفيديو الثالث

الفيديو الرابع

**نانسى السكرة** · 09-01-2010, 08:00 AM

نانيس سليم تقدم مجموعة جديدة من لفات الطرح

النهارده هنشوف مجموعة متنوعة من لفات الطرح ، بس قبل ما نشوف المجموعة المختلفة دي هنتكلم في الأول عن شوية حاجات بسيطة ممكن تساعد أي بنت محجبة على اختيار الطرحة، أو الإيشارب بطريقة صح...

قبل ما تشتري فكري

علشان البنت تشتري طرحة كويسة يبقى لازم قبل ما تنزل تشتري تفكر وتعرف هي ناقصها إيه في الدولاب؟!..علشان كده بقول لكل بنت افتحي دولابك وشوفي عندك كام بادي وكام تي شيرت وكام بنطلون وإيه هي الألوان اللي أنت محتاجة لها، علشان لما تشتري تكون الحاجة اللي هتشتريها مناسبة للون اللبس اللي عندك....كمان لازم يكون في دولابك ألوان أساسية زي الأبيض والبني والرمادي والأسود والبيج لأن الألوان دي بتليق على كل اللبس.

كمان لو مش عارفة تجيبي نفس درجة اللون أو الخامة اللي أنت عايزاها يبقى لازم تلفي على أكتر من محل لغاية ما تلاقي اللي أنت عايزاه.

نقره على هذا الشريط لتكبير الصورة

اختاري اللون المناسب لبشرتك
هنتكلم دلوقتي عن إزاي البنت تختار لون الطرح المناسبة للون بشرتها ودي المرحلة التالية بعد ما البنت تحدد اللي محتاجة له.. وفيه حاجة لازم ألفت نظرك إليها، وهي إنك ما تحطيش ماكياج صارخ وأنت نازلة تشتري الطرح علشان تقدري تختاري الطرح المناسبة ليكي، وكفاية إنك تكوني حاطة ماكياج خفيف، كمان حاولي تلبسي ألوان سادة وأنت رايحة تشتري الطرح أو الإيشاربات علشان تقدري تختاري اللي أنت عايزاه، وياريت بعد ما تختاري الخامة واللون اللي أنت عايزاه تحطي الإيشارب على وشك وتقفي قدام مرايات المحل وتشوفي إذا كان اللون مناسب للون بشرتك فعلا ولا لأ؟!

وبصفة خاصة بنلاقي...
إن أصحاب البشرة الخمرية بيليق عليهم الألوان الفاتحة والغامقة والوسط...

لكن البنات أصحاب البشرة البيضاء بيليق عليهم الألوان الغامقة زي الأسود والكحلي والأخضر والأحمر الغامق والذهبي الغامق... وطبعا مش بيليق عليهم الألوان الفاتحة زي الأبيض أو الأصفر الفاتح أو الرمادي الفاتح نهائي، لأن الألوان دي بتخلي الوش كله يبان كأنه شاحب، علشان كده بنلاقي إن البنات اللي بتلبس إيشاربات ألوانها فاتحة وبشرتها بيضاء بيحتاجوا يحطوا ماكياج كتير علشان بشرتهم ماتبانش مجهدة وشاحبة...

أما البنات أصحاب البشرة السمراء أو الداكنة فالحاجة المناسبة لهم هي الإيشاربات الفاتحة طبعا زي "الموف الفاتح"و"التركواز" و"الفوشيا" و"الأخضر الفاتح" ويفضل طبعا إنهم يحطوا ماكياج خفيف وما يحاولوش يفتحوا لون بشرتهم ويقتنعوا إن البشرة السمراء دي ميزة لأنها مابتعجزش بسرعة وما بيبانش فيها أي تجاعيد بسرعة.

نقره على هذا الشريط لتكبير الصورة

السعر على حسب الخامة
كل خامة في الإيشاربات ولها ثمن محدد ومعروف، يعني مثلا ما ينفعش حد يقول لك إن القطن اللي فيه تطريز بأقل من 50 أو 60 جنيه وعلى فكرة القطن السادة بيبدأ من10 جنيه وبيوصل لغاية 30 جنيه، أما الشيفون فبيبدأ من 20 أو 30 أو 40 جنيه، ده في حالة لو فيه تطريز خفيف مش كتير، أما الطرح المكشكشة فدي بتكون في حدود 15 أو 20 جنيه بالكتير جدا ممكن توصل إلى 25 لو فيها تطريز، كمان التول مش غالي خالص فالمتر سعره حوالي 25 جنيه وسعر الطرحة الواحدة حوالي 5 جنيه، لكن الستان هو اللي بيبقى غالي شوية، هو والحرير. وفيه حرير بيوصل لـ90 أو 120 جنيه، وده ممكن تلاقيه في المحلات الكبيرة والمولات زي "جنينة مول" و"سيتي سنتر" و"سيتي ستارز".
أما بالنسبة للطرح اللي بتتلبس من تحت الطرح فبتكون أرخص بكتير من الإيشارب الأساسي، فممكن البندانة تبقى بـ2 أو 3 جنيه، وفيه حاجات كبيرة شوية بتوصل إلى 6 جنيه، وفيه أشكال كتيرة منها الشكل السوري والتركي والمصري، وعلى فكرة تمن الإيشارب الكبير بيبقى أغلى من البونيهات أو البندانات...

نقره على هذا الشريط لتكبير الصورة

الجديد في عالم الإيشاربات
أحب أقول لكم على حاجة إن مابقاش فيه حاجة اسمها طرحة خامتها جديدة، وطرحة خامتها قديمة، فيه حاجة اسمها طرح عليها شكل جديد أو تطريز جديد، لأن الخامات موجودة في كل الأوقات ومالهاش موضة محددة.

وممكن نقول إن الإيشاربات الستان المنقوشة هي أحدث حاجة نازلة في الإيشاربات، وعلى فكرة الإيشارب الستان ده بينفع لكل المناسبات والأوقات فممكن يتلبس الصبح، أو في السهرة، مش كده وبس ده مابقاش فيه حاجة اسمها إن الستان المنقوش يتلبس على الحاجات السادة فقط لأنه ممكن يتلبس على حاجة منقوشة وبيدي شكل في منتهى الشياكة.

نقره على هذا الشريط لتكبير الصورة

الوان الإيشاربات اللي نازلة موضة
بتلاقي إن التركواز والأصفر والموف الفاتح والأحمر والأخضر والأزرق والبرتقالي وكل الألوان الطبيعية هي الموضة.

كمان لازم تجربي الإيشارب على نفسك قبل ما تشتريه وتعرفي هتربطيه إزاي لأن ما ينفعش تختاري الإيشارب من بعيد وتاخديه، لازم تجربيه الأول وتشوفي شكله هيكون عامل إزاي؟! وياريت ما تجيبيش الطرح الكبيرة اللي مش هتعرفي تربطيها، خليكِ في الحجم الطبيعي اللي هو طرح طولها 120 سم وعرضها 40 سم..

ولو كنت سنة أولى حجاب

دلوقتي عايزة أقول شوية نصائح للبنت اللي أول مرة تلبس حجاب.. وعلى فكرة النصائح دي برضه مفيدة لأي بنت محجبة...

-1-
ما تحاوليش تجيبي الطرح الصعبة زي الستان أو المكشكشة أو الحرير أو الطرح اللي فيها تطريز كتير لأن كل ما كانت الطرحة بسيطة وما فيهاش تطريز كتير هتكون أسهل في اللبس، وعلى فكرة القطن مناسب جدا هو والشيفون التقيل أسهل في الربط من أي طرحة تانية.

-2-
لو كنت بتشتكي إن الطرحة بتاخد منك وقت طويل في اللبس يبقى ممكن تلبسي بندانة قطن تحت الطرحة وده لأن البندانة هتساعدك إنك تربطي الطرحة بسرعة.

كمان خدي بالك إنك لو هتلبسي طرحة شفافة وهتبين شعرك من تحت يبقى المفروض تلبسي تحتها بونيه خفيف أو طرحة تانية قطن أو بندانة علشان تداري شعرك.

-3-
أنصح أي بنت لسه هتتحجب أو تلبس إيشارب جديد إنها تاخد بالها من لبسها لأن اللبس عليه عامل مهم جدا في اختيار الإيشارب، فمينفعش تلبسي ضيق من تحت وتكوني محجبة لأن بكده هتكوني منتقدة أوي، وياريت قبل ماتتحجبي تظبطي لبسك وتجيبي هدوم واسعة مناسبة للحجاب.

-4-
اوعي تلبسي طرح فيها تطريز وحاجات بتلمع كتير وأنت رايحة الجامعة أو الشغل الصبح، لأن ده شيء مرفوض تماما ومش مناسب للجامعة أو للشغل وبيقلل من شياكتك.

-5-
دلوقتي انتشرت الإسدالات السوداء. بصراحة أنا مش بفضل شكلها لأنها مابتديش شياكة، بالإضافة إلى إن الإسدال بيترب من الأطراف بسرعة. علشان كده بانصح البنات اللي عايزين يلبسوا لبس إسلامي واسع إنهم يلبسوا عبايات واسعة يكون فيها نفس مواصفات الإسدال، يعني ما تكونش ضيقة من عند الصدر أو الوسط ومش قصيرة، وأنا بفضل العبايات السعودية اللي شكل الفراشة لأنها بتكون ممسوكة من عند الأكمام وبتكون واسعة من عند الإيد.

-6-
لو كان وشك صغير ومش عارفة تربطي الطرحة إزاي؟! فقدامك أكتر من حل علشان وشك يبان من الطرحة...

أولا: ممكن تروحي عند أي مركز تجميل متخصص علشان يعمل لك عملية إزالة للشعر الموجود في منطقة القورة بالفتلة أو بالتشقير بحيث إن منطقة الجبهة تكبر شوية.
ثانيا: حطي ماكياج خفيف بحيث يفتح منطقة الجبهة.
ثالثا: ماتجيبيش طرح كبيرة لأن كل ما كانت الطرحة متوسطة الطول أو صغيرة شوية هتخلي وشك طبيعي، وياريت تلبسي طرح فاتحة علشان تكبر منطقة الوش شوية.
رابعا: حاولي تبعدي في اختيارك عن الطرح الخفيفة اللي بتتزحلق زي الستان والحرير والشيفون الخفيف خصوصا لو كنت هتلبسيهم من غير بندانة.
خامسا: ممكن تربطي الطرحة بالطريقة العادية أو تعمليها إسبانش، بس في الوقت ده بتبقى البندانة من تحت وتربطي الإيشارب من ورا بدبوس، وبعد كده بتلفي الإيشارب من وراء حوالين شعرك زي الشينيو أكتر من مرة علشان كل ما كانت الطرحة كبيرة من وراء وشكلها ضخم هتدي شياكة وأناقة وشكل حلو للبنت اللي وشها صغير وبيكون شكلها زي الإسبان.
-7-
لكن لو كان وشك كبير يبقى خدي بالك من شوية الحاجات دي وأنت بتلفي الطرحة...

أولا: إن الطرح الإسبانش اللي جاية لوراء مش مناسبة ليك نهائي، وأفضل لفة ليكي هي اللفة العادية أو إنك تعمليها إسبانش وتجيبي طرف من الطرحة للأمام علشان تداري الرقبة أو الغدد اللي بتكون موجودة تحت الرقبة، ودي حاجة بتشتكي منها بنات كتير.
ثانيا: حاولي تصغري وشك باستخدام الماكياج زي مثلا إنك تستخدمي الروجاجو البيج الغامق علشان تحاولي تصغري وشك شوية.
ثالثا: ياريت تختاري طرح سادة أو يكون طرفها هو اللي منقوش أو فيها تطريز بسيط وابعدي نهائي عن الطرح اللي فيها نقوش كبيرة واللي فيها تطريز كتير لأن كل ده بيشد النظر إلى وشك وبيبين حجمه.

**نانسى السكرة** · 09-01-2010, 08:05 AM

ودلوقتي تعالوا نشوف مجموعة جديدة من الربطات

نقره على هذا الشريط لتكبير الصورة

**نانسى السكرة** · 09-01-2010, 08:07 AM

لفات للعروسة وليلة العمر

نقره على هذا الشريط لتكبير الصورة

لفات طرح للعبايات بس

**نانسى السكرة** · 09-01-2010, 08:10 AM

نصائح ربطات الحجاب مع مني المسيري

ودلوقتى هنتكلم عن موضة ملابس المحجبات والتي تعنى قطع الملابس التى ترتديها المحجبة لتغطية جسمها وقد تكون الطرحة جزء منها ولكن موضة الحجاب من ربطات وخامات وأقمشة وألوان لها حديث آخر وأن كان اى جديد فى موضة الحجاب لابد من ان يتماشى مع موضة ألوان الثياب عموما ولكن الأصل التنسيق بينها وليس توحيد الحجاب مع الأزياء وعن جديد وموضة للفات الطرح والوانها واقمشتها لموسم شتاء 2010 تتحدث خبيرة الماكياج وربطات الحجاب المصرية منى المسيري التى تقدم فقرة نصائح للجمال ببرنامج النص الحلو على قناة الأسرة والطفل ..

جديد ربطات ولفات الطرحة:
عموما تميل الربطة الجيدة إلى أن تكون ملمومة نحو الأمام وكثيفة وستكون المحجبة محظوظة إذ راجت ألوان وخامات تجعل الحجاب ينافس أفضل قصات الشعر المبتكرة وتسريحاته فتتألف ربطات الصباح غالبا من طرحة أو اثنتين وتعتمد على البساطة أما مساء فيمكن التفنن في الربطة وفق المناسبة وينصح بالربطات الإسبانية الكثيفة المؤلفة من لونين متناسقين أو أكثر بما يتماشى مع ألوان الأزياء

- تعود الربطة الإسبانية إنما بأشكال جديدة تعتمد على خامة الطرحة وشكلها وذلك بعد ظهور موديلات طرحات متميزة هذا الموسم لها وصلات مموجة وأكسسوارات معدنية
- الربطة العالية وهي ابتكار مستوحى من التراث العربي القديم نستخدم تقنية الربطة الإسبانية في الطرحة الأولى التي يفضل أن يختلف لونها عن لون الطرحة الثانية ولكن تتناسق معها كذلك يمكن إضافة طرحة ثالثة وهي ربطة تعتمد على إبراز كثافة الحجاب حول الوجه ما يساير الموضة في ابتكاراتها الجديدة وتربط بعقدة أعلى الرأس وهى تلائم الوجوه المستديرة الممتلئة فيما لا تناسب الوجوه الطويلة النحيفة ولإتقان ربطة الحجاب الإسبانية يراعى استخدام أكثر من طرحة تربط الأولى وتكون من لون معين وتختار الثانية بألوان تناسب اللون الأول وتسحبها من أسفل إلى الأمام فيمكن أن تعقد من أعلى الرأس ثم تربط أسفل الذقن مضفية كثافة على الوجنتين فتكتسب شكلا جماليا مميزا
- اما عن موضة لفة حجاب العروس فتميز ربطة رأس العروسة بأنها على شكل حجاب قصير مكون من ثلاثة مستويات بحيث يكون منفوشاً من الأعلى ومن الجانبين ومزينا بتاج صغير أعلى الرأس فيمنح العروس المحجبة مظهرا ملوكيا
وفى النهاية يجب ان تختار الفتاة ربطة الحجاب الملائمة لها بحسب شكل وجهها مثلا إذا كان مستديرا تناسبها الربطات الإسبانية أما إذا كان نحيفاً مثلثا فتناسبها الربطات العادية وإذا اختارت الربطة الإسبانية فعليها أن تكثفها عند وجنتيها

أحدث ألوان الطرح:
درجات الأزرق والبنفسجي والمشجرات من ألوان متداخلة اما بالنسبة لموضة حجاب للعروس ثمة لونان أساسيان يتوافقان مع العروس المحجبة هما السكري والأبيض إنما السكري رائج أكثر وبخامات لامعة تجعل لون الحجاب يشبه اللؤلؤ وتضفي على العروس سحرا وجمالا

جديد خامات أقمشة الطرح:
الكتان الخفيف والساتان والقطن والشيفون ولم يعد التطريز موضة إذ حلت محله الأحجار المعدنية فهي تضفي الفخامة والجاذبية والأناقة غير المبتذلة وثمة إقبال كبير عليها

موضة أكسسوار الحجاب:
تتميز الطرحة بأن أكسسوارها من ضمنها وهو قماش موصول بها يكون في الغالب مزركشا ومختلفا عن لون الحجاب الأساسي ومموجا لإضفاء تكوين جديد للحجاب على وجه الفتاة وإذا أضيفت إليه ربطة مناسبة يغني عن الأكسسوار تماما

نصائح لمشاكل ربط الطرحة وتناسقها

كمحجبة ترتدى الطرح المختلفة تقابلك مشاكل فى لف الطرحة وعدم تناسقها سوا مع مع شكل الوجه أو لون البشرة خصوصا إذا كنتى جديدة على عالم المحجبات وأول مشكلة تقابك معرفة موضة الطرح الجديدة واللون المناسب للون البشرة واللفة التى تناسب شكل وحجم وجهك وكيفيفة لف الطرحة بأكثر من طريقة وهذا سبق وتكلمنا عنه ... أما هناك أسئلة ومشاكل شائعة تحتاج إلى نصائح خبراء المحجبات منها كيف يناسب الحجاب المناسبات المختلفة وكيف يتناسق مع الملابس ومالحل إذا كانت الطرحة لاتثبت وتتزحلق من على الرأس ويفسد مظهرها وما الحل فى للفة الطرحة التى تأخذ وقت طويل

الطرحة تأخذ وقت طويل
وينصح بإرتدا بندانة قطن تحت الطرحة وينصح أيضا بالإبتعاد عن الطرح الصعبة والناعمة كالأورجانزا والستان والحرير للأنها تنزلق وكل ما كانت الطرحة بسيطة وما فيهاش تطريز كتير هتكون أسهل في الإرتداء فيفضل الطرح الخفيفة والمتماسكة كالقطن والشيفون التقيل لأن اختيار نوع الطرحة يساعد في اللف وأما أنها تأخذ وقت طويل لأنك غير متقنه لف الطرحة فقومى هنا بمراجعة طرق لف الطرح الفيديو أو الصور واختارى الطريقة الذى تريدها وشاهديها جيدا وقومى بمشاهدتها مرة أخرى أثناء لفك الطرحة خطوة بخطوه

الطرحة لا تثبت وتتزحلق بعد فترة
فهنا إما إنك تستخدمى قماشة ناعمة كالحرير مثلا دون إيشارب من القطن أوالكريب أو باندا تحتها لتثبيت لفة الطرحة لان الشعر ملمسه ناعم وهى ناعمة فلا تثبت عليه وإما لا تستخدمى دبابيس مثبته جيد أو عددها ناقص وغير كافى لشد الطرحة طول فترة ارتدئها وهنا يجب أن تراعى دبابيس الطرحة اللى تحت لأنها الأساس كما تراعيها فى الطرحة اللى فوق

تناسق الطرحة مع الملابس
ارتداء طرحة سادة إذا كانت الملابس مشجرة أما الملابس السادة فنرتدي معها طرحة منقوشة وتكون البندانة بلون النقش الخفيف الموجود فى الطرحة حتى لا يكون المنظر مؤذياً للعين وحتى لو كانت طبعات الإيشارب مختلفة عن تلك المستخدمة في الثياب والملابس

تناسق الطرحة مع المناسبة
قماشة الطرحة تختلف تناسبها حسب الوقت ففى الصباح يختلف الأمر عن المساء وعن السهرة
فى الصباح أفضل أنوع القماش هو القطن والكريب والطرح التى بها تطريز بسيط وخفيف وهنا لا يضاف أكسسوارت الطرح لانها تناسب المساء والسهرة أكثر وخصوصا اللمعة ويمكن أستخدام الإكسسوات البسيطة والصغيرة كأشكال النجوم والورد
فترة بعد الضهر والمساء يناسبها الأورجانزا والإسكارفين وهى خامة تشبه الحرير إلى حد ما مع الأخذ في الإعتبار أن الإيشارب الخاص بالمساء يفضل أن يكون ذا لمعة خفيفة ومزين بتطريز بسيط لأنه مختلف عن الإيشارب الخاص بالسواريه فيجب الإبتعاد عن الـبرق والستراس حتى نفصل بين المساء والسوارية
السهرات والسواريه يمكن استخدم كافة أقمشة الطرح وخاصة التى بها تطريز والستراس والريش ويمكن إستعمال الإكسسوارت اللامعة فوق الحجاب كعقد أو بروش من الأحجار الكريمة أو اللولى أو الألماظ

**نانسى السكرة** · 09-01-2010, 08:15 AM

اتمنى يعجبكم بنات موضوعى ويكون فيه افادة ليكم

بتمنى تستفيدوا منه واتمنى ينال اعجابكم

اختكم

نانسى الســـــــــــــــــــــــــــــكرة

**ضوء الليل** · 09-01-2010, 03:00 PM

مشكورة على المجهود الرائع

يستاهل تقييم +تثبيت

العضوة
**ضوء الليل**

**نانسى السكرة** · 09-01-2010, 09:56 PM

اقتباس:

المشاركة الأصلية كتبت بواسطة ضوء الليل


	مشكورة على المجهود الرائع يستاهل تقييم +تثبيت العضوة ضوء الليل

مرسى على مرورك الجميل يا قمر

**فدوى محمد** · 10-01-2010, 02:13 AM

روووووووووووعة حبيبتي. يجننوا

بموت في اللفات الشيك. تسلمييييييييي

**مروه المتفائله** · 11-01-2010, 02:31 PM

اقتباس:

المشاركة الأصلية كتبت بواسطة نانسى السكرة


	اتمنى يعجبكم بنات موضوعى ويكون فيه افادة ليكم بتمنى تستفيدوا منه واتمنى ينال اعجابكم اختكم نانسى الســـــــــــــــــــــــــــــكرة

انتي احلى من كدا بكتير

بدون مجامله والله ابداااااااااااااااااااااااااااااااااااااااااااااااااااع

الموضوع حلو ومنظم ومفيد ومميز وكل حاجة حلوه...ربنا يجزيك خير..

وليك مني احلى تقييم للموضوع وليك

برافو عليك..يسلموووووووووووووووو

**سمورة الامورة** · 11-01-2010, 02:55 PM

نانسي السكرة
بجد سكرة
مواضيعك دائما متالقة ومفيدة
ارجو التثبيتتتتتتتتتتتتتتتتتتتتتتتتتتتتتتتتتتتتتتتتتتتتتت
وتستاهلين تقييم رائع
ربنا يخليك لينا
وللامام دوما

**نانسى السكرة** · 09-02-2010, 05:28 PM

مرسى بنات كتير على التقييم الجميل ده

اتمنى يكون عجبكم واستفدتم منه

فى ماشاء الله 1000
مشاهدة ودى الردود بس

**ملكة الرقة** · 24-02-2010, 05:02 PM

هدا حلوة شكرا حبيبتي

**ريماية** · 25-02-2010, 12:08 AM

حبيبتي نانسي
مجهود كبير جدا
وموضوع في منتهى الروعة
شامل كل شيء
تسلم ايديكي حبيبتي
ولكي مني احلى تقييم
لاحلى نانسي

**روعة الأصالة** · 02-03-2010, 02:29 AM

يااااااااااااااي بالمرة تجنن و تاخد العقل
ماننحرم منك حبيبتي
بس عندي طلب ممكن تديني اسم الكتالوج ضروري لأنو سفري بعد شهرين
ف بليييز بليييز بليييز ما تنسيني
يسلموووووووووو

**رنوشان** · 05-03-2010, 04:17 PM

يعني بصراحة الموضوع مو بس رائع
أكتر من رائع
بجننننننننننننننننننننننننننن
أنا مالي محجبة بس ناوية ان شاء الله
و هاد الموضوع كتير عطاني أفكار حلوة

الله يسلم إيديكي يا رب
و عن جد موضوعك بيستاهل الكل يقراه
الله يعطيكي ألف عافية

سلامي لإلك
و شكرا

**عيون الحب** · 13-03-2010, 10:09 AM

ازياء جدا راقيه

وذوووووق تسلم يدينك ياعسل
وماننحرم من جديدك

فرقة نجووووووم فرح

**.طمطم** · 13-03-2010, 07:00 PM

وااااااااو

رائعين كتييييييير

ان شاء الله بجرب وحدة منهم (لاني الحمد لله محجبة)

شكرا حبيبتي

وما تحرمينا من مواضيعك القيمة

مع تحيات

**ميساء** · 15-03-2010, 11:45 PM

تسلم الايادي نونسه
زوقهم جمييييييييل
جزاءكي الله خيرا
علي الافاده

فانتظار ابداعاتك القادمه تحياتي لكي
اختك ميــــــــــــــــــــــ

ساء

فرقة النجوووووم

**توتواه** · 18-03-2010, 09:05 AM

عورتني ايديني و انا احرك الماوس موضوعك وايد طويل بجد طويل يباله ساعه تقري و تعريفي و تتعلمى بس في الاخر موضوع متكامل من جميع النواحى فغديتك مرسي بزاف بس انا لو اموت ما راح اعرف الف هاللفات ابدا ما اعرف هعهعهعهعهعهعهعهعهع

موضوع في قمة الروعه و التنسيق و الفنتكه

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

للمحجبات, كتالوج

كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى

رد: كتالوج للمحجبات صور وفيديو مع نصائح لكى